Mu gitondo cyo ku wa Kane, Itsinda ry’abapolisi biganjemo abapolisikazi riyobowe na SSP Donatha Nyinawumuntu, ryahagurutse i Kigali ryerekeza mu Mujyi wa Juba muri Sudani y’Epfo, mu butumwa bw’Umuryango w’Abibumbye bwo kubungabunga amahoro muri iki gihugu (UNMISS).
Iri tsinda rya RWAFPU3-7 rigizwe n’abapolisi 80 ryagiye risimbuye irya RWAFPU3-6 ryari rimaze umwaka riri mu butumwa bw’amahoro.
Iri tsinda ryageze i Kigali, ku gicamunsi cyo ku wa Kane, riyobowe na SP Emmy Karangwa, ryakiriwe ku Kibuga Mpuzamahanga cy’Indege cya Kigali kiri i Kanombe na CP Yahaya Kamunuga.
CP Yahaya Kamunuga ubwo yakiraga aba bapolisi yabashimiye imyitwarire myiza n’ubunyamwuga bagaragaje mu nshingano bari bafite muri Sudani y’Epfo.
Ku wa 13 Mutarama, mbere y’uko itsinda rya RWAFPU3-7 ryerekeza muri Sudani y’Epfo, baganiriye n’Umuyobozi Mukuru wa Polisi y’u Rwanda wungirije ushinzwe Ibikorwa, DIGP Vincent Sano, abasaba gushyira mu bikorwa inyigisho bahawe barangwa n’umwete, ubunyamwuga n’imyitwarire myiza mu nshingano bagiyemo.
Abapolisi b’u Rwanda batangiye koherezwa muri Sudani y’Epfo mu 2015. Kuri ubu u Rwanda ruri kubungabunga amahoro mu bihugu bitatu bya Afurika, ari byo Sudani y’Epfo, Mozambique na Centrafrique.
