Umuhanzi Itahiwacu Bruce uzwi ku mazina ya Bruce Melody yashyize hanze urutonde rw’indirimbo 17 zigize alubumu ye ya gatatu yise ‘Colorful Generation’, zirimo izo yakoranye n’abahanzi bo hanze y’u Rwanda barimo JoeBoy, Bien wo muri Sauti Sol, n’abandi.
Ku munsi wo ku wa kane, tariki ya 12 Ukuboza 2024, nibwo Bruce Melody yasangije abamukurikira ku mbuga nkoranyambaga, urutonde rw’indirimbo 17 zizaba zigize alubumu ‘Colorful Generation’, abakunzi be bari bamaze igihe kitari gito bategereje.
Kuri iyi alubumu hariho indirimbo nshya yakoze wenyine n’izindi yahuriyemo n’abahanzi barimo n’abanyamahanga, nka JoeBoy ukomoka muri Nigeria bakoranye ‘Beauty on Fire’, Bien-Aime wo muri Sauti Sol bakoranye ‘Iyo Foto’, umuraperi Bull Dogg bakoranye ‘Ndi umusinzi’ Blaq Diamond, Biensoul n’abandi.
Ni alubumu Bruce Melody yari yaratangaje ko izasohoka muri uyu mwaka wa 2024, gusa bitunguranye aza gutangaza ko izajya hanze mu 2025.
Nubwo bimeze bityo, uyu muhanzi, yateguriye abakunzi be ijoro ryo kubasogongeza kuri uyu muzingo, rizabera muri Kigali Universe, rikazitabirwa n’abantu 500, basabwa kuzaza bambaye umukara.
Amatike yo kwinjira muri iki gitaramo mbere y’umunsi nyirizina ni ibihumbi 20 Frw, mu myanya isanzwe ari ibihumbi 40Frw, naho abazagurira ku muryango ni ibihumbi 30Frw mu myanya isanzwe, ibihumbi 50Frw mu myanya y’icyubahiro n’ibihumbi 100 ku myanya y’ihariye.
