Umunyarwanda Kalimunda Jean Damascène wahoze mu mutwe w’Iterabwoba wa FLN washinzwe na Paul Rusesabagina, yitandukanyije n’uyu mutwe, asobanura byinshi ku mikorere yawo yari igamije gusenya u Rwanda.
Kalimunda aganira na RBA, yasobanuye ko yinjiye muri FLN mu 2018, abwirwa ko ajyanywe mu mutwe ugamije kubohora u Rwanda. Icyo gihe binjiriye muri Nyungwe bahinguka mu ntara ya Cibitoke mu Burundi.
Kalimunda yasobanuye byinshi mu buzima babayemo ubwo bari muri FLN aho bigishwaga amayeri ya Gisirikare arimo gusenya ibikorwaremezo birimo ibiraro, gutwika imodoka, babwirwa ko bagomba gutera u Rwanda bakabohora Abanyarwanda.
Asobanura ko FLN yari ifite abarwanyi batarenze 130, barimo abakobwa bajyaga bafatwa amafoto akohererezwa abanyamahanga kugirango bahabwe inkunga nayo yaheraga mu bayobozi.
Kalimunda avuga ko icyamuteye kuva muri FLN ari ivangura ryiganjemo ndetse asobanura ko iyo utumvikanye n’umuyobozi cyangwa ntakwiyumvemo bishobora kuvirwamo kwicwa.
Ati “Mbibonye gutyo naje gufata iya mbere mbavamo ariko amakuru ariho ubu, abo bayobozi bagenda bavuga ko napfuye ariko ndiho. Icyo nashishikariza bagenzi banjye bariyo ni uko bashakisha inzira bagataha mu Rwanda rwababyaye, ni amahoro.”
Kalimunda avuga ko icyamuteye imbaraga zo gutoroka ari uko bumvaga mu binyamakuru ko abarimo Rusesabagina na Sankara bafashwe ariko ntibicwe. Asobanura ko FLN ari umutwe babagamo ariko utagira ingabo zo kurwana n’icyo urwanira ahubwo wuzuyemo ivangura.
Mu mwaka wa 2018, umutwe wa FLN wagabye ibitero mu Burengerazuba n’Amajyepfo y’u Rwanda bihitana abaturage b’inzirakarengane, ndetse barangiza banasahura imitungo.
Ibi bikorwa byaje guhagarikwa n’ingabo z’u Rwanda nyuma y’ifatwa rya Paul Rusesabagina wawushinze na Nsabimana Callixte uzwi nka Sankara wari umuvugizi waryo.
