Kaminuza yo muri Amerika yitwa Sacramento State yubatse ikimenyetso cy’urwibutso rwa Jenoside yakorewe Abatutsi mu 1994, biteganyijwe ko kizatahwa muri Mata 2025.
Guhera ku wa kane, tariki ya 14 Ugushyingo 2024, muri Kaminuza ya Sacramento State hari kubera Inama Mpuzamahanga ya gatandatu, igaruka kuri Jenoside.
Ni inama yitabiriwe na Minisitiri w’Ubutabera akaba n’Intumwa Nkuru ya Leta, Dr Ugirashebuja Emmanuel, aho yigishije uburyo Jenoside yakorewe Abatutsi mu 1994 yateguwe, igashyirwa mu bikorwa n’ingaruka zayo.
Yagaragaje ko kwibuka Jenoside yaba iyakorewe Abatutsi n’izindi zabaye mu bihugu bitandukanye, ari ukugirango ibirago bishya bimenye ahahise ndetse bahigireho.
Ati “Uyu munsi, ¾ by’Abanyarwanda bose bari munsi y’imyaka 35. Ibi bisobanuye ko hafi ya bose bari bataravuka cyangwa bari bakiri bato muri Jenoside yakorewe Abatutsi ku buryo batibuka ayo mahano yabaye.”
Minisitiri Ugirashebuja yagaragaje ko bibabaje kuba hari aho ku Isi hakigaragara ingengabitekerezo ya Jenoside kandi bakabaye barigiye ku mateka. Yaboneyeho gusaba abakiga politiki n’iyubahirizwa ry’amategeko ko bakwiye gufatanya n’abari mu mirimo guhashya burundu iyi myumvire.
Iyi Kaminuza ya Sacramento State yubatse ikibumbano cy’urumuri cy’urwibutso rwa Jenoside yakorewe Abatutsi mu 1994, mu rwego rwo kubaha icyubahiro.
