Ubuyobozi bw’Umujyi wa Kigali bwasabye abashora imari mu bikorwaremezo kujya bubaka inyubako zifite parking mu rwego rwo gukemura ikibazo cy’abantu bagorwa no kubona aho baparika ibinyabiziga iyo bagiye gushaka serivisi.
Ni ikibazo cyakunze kugaragazwa n’abantu benshi, by’umwihariko abakora n’abahahira mu Isoko rya Nyarugenge n’impande zaryo, bavuga ko inyubako zihari zitateganyije ahantu ho guparika ibinyabiziga, ibi bituma bagorwa no kujya kuhashakira serivisi.
Abatuye n’abakorera mu Mujyi wa Kigali bavuga ko kubona parking ari ikibazo gikomeye, cyangwa se hamwe na hamwe zikaba zihari zitemerewe gukoreshwa, ndetse bikagendana n’ikiguzi cy’iyi serivisi kiri hejuru.
Abakorera mu Mujyi wa Kigali rwagati bavuga ko igiciro cyo guparika ku isaha gishobora kuva ku mafaranga 200 Frw, 500 Frw cyangwa hejuru yayo bitewe n’abantu.
Umuvugizi w’Umujyi wa Kigali, Emma Claudine Ntirenganya, yabwiye RBA ko iki kibazo kwizwi ndetse kiri gushakirwa umuti.
Ati “Ntabwo parking zihagije, ubona ko mu mujyi hagenda haza imodoka z’abantu ku gito cyabo bityo ugasanga parking ntizihagije.”
Emma Claudine yasobanuye ko icyatumye ikibazo cya parking kigira ubukana ari uko inzu zakorerwagamo mu myaka yashize zitigeze ziteganya ahantu ho guparika ibinyabiziga.
Ati “Inzu zagiye zubakwa kera ntizigeze ziteganya parking hanyuma kandi kuba inzu zitarateganyije parking, ugasanga muri icyo gihe ni imihanda twari dufite ntabwo yari minini bihagije ku buryo twari kuvuga ngo dusize parking iruhande rw’umuhanda.”
Umujyi wa Kigali uri gukora ku buryo umuntu wese uzaba ashaka kubaka inyubako hagati mu mujyi, azajya yerekana igishushanyo mbonera kizagaragaza ahantu hazubakwa parking.
Ubuyobozi bw’Umujyi wa Kigali bugaragaza ko hari bimwe mu bice byegereye umuhanda bishobora kuba byakifashishwa mu guparika mu gihe parking nyazo zitarubakwa.
Umujyi wa Kigali kandi uri gutekereza uko mu gukemura mu buryo burambye ikibazo cya parking hazubakwa inzu zihariye zo guparikamo ibinyabiziga.
