Umukinnyi w’isiganwa ry’ama modoka rya Formula 1, Lewis Hamilton, yatangaje ko afite inzozi zo gukinira uyu mukino mu Rwanda, mbere y’uko ahagarika gukina.
Biteganyijwe ko tariki ya 13 Ukuboza 2024, u Rwanda ruzakira inama y’inteko rusanjye y’ishyirahamwe ry’umukino w’imodoka, FIA, ndetse nyuma yayo hazaba umuhango wo gutanga ibihembo ku bitwaye neza muri Shampiyona zikomeye zirimo na Formula 1.
Lewis Hamilton w’imyaka 39, ni umwe mu bakomeye mu mukino wa Formula 1. Aherutse kumvikana mu bitangazamakuru avuga ko yifuzaga kuzakinira uyu mukino ahantu hashya nko muri Afurika, mu Rwanda, mbere y’uko ajya mu kiruhuko.
Ati” Kimwe mu bintu byiza cyane nuko nshobora kugira uruhare muri aya marushanwa mashya. Mpora mvuga kuri Afurika, gusa u Rwanda ruza imbere kandi ni byiza.”
Yakomeje avuga ko gukinira iri siganwa mu Rwanda ari amahirwe akomeye n’inzozi afite, mbere y’uko ahagarika gukina kubera izabukuru.
Mu gihe hari kurebwa uburyo Formula 1 yakongera kubera muri Afurika, nyuma yuko haheruka iyo mu 1993, yabereye muri Afurika y’Epfo. U Rwanda rwasabye kuyakira, kuko hari umusanzu ryatanga ku gihugu, no ku mugabane wa Afurika.
