Minisiteri y’Uburinganire n’Iterambere ry’Umuryango, MIGEPROF, yatangije ubukangurambaga bwo kurwanya ihohoterwa rikorerwa abantu batandukanye biganjemo abagore n’abakobwa, hifashishijwe imbuga nkoramyambaga.
Ubu bukangurambaga bwiswe ‘My Digital Space Should Be Safe‘, bwatangiye tariki ya 16 Ukuboza 2024, bugamije gukangurira Abanyarwanda kwirinda guhutaza uburenganzira bwa muntu hifashishijwe imbuga nkoranyambaga.
Ubushakashatsi bwakozwe n’Ishami ry’Umuryango w’Abibumbye ryita ku Mibereho Myiza y’Abaturage, UNFPA, bugaragaza ko mu mwaka wa 2023, ihohoterwa ryakorewe abagore n’abakobwa riri kuri 33%.
Umuyobozi wa UNFPA, Thérèse Karugwiza avuga ko abantu muri rusanjye bagomba gufatanya kugirango bubake umutekano w’abakoresha imbuga nkoranyambaga, ndetse ribe ahantu ho gukoreshwa mu bikorwa byo kwiteza imbere kurusha ibikorwa by’isebanya no guharabika.
Umunyamabanga Uhoraho muri MIGEPROF, Mireille Batamuliza yagaragaje ko ihohoterwa rikorerwa ku mbuga nkoramyambaga rigira uruhare ku rubyiruko.
Ati” Ihohoterwa ryo kuri murandasi rinyuranyije n’uburenganzira bwa muntu kandi rigira ingaruka zikomeye ku buzima bw’abakiri bato, bikanatuma bamwe bahura n’agahinda gakabije cyangwa bamwe bakiyahura.”
Ubuyobozi bw’Urwego rw’Igihugu rushinzwe kugenzura imikorere y’inzego zimwe z’imirimo ifitiye Igihugu akamaro (RURA), bugaragaza ko hari kurebwa uburyo hanozwa imigenzurire y’ikoreshwa rya murandasi, mu rwego rwo gukumira ibidahwitse byarikoreshwa.
