Minisiteri y’Ibikorwaremezo yateguje gahunda y’uko mu gihe kiri imbere hazajya hatangwa ibyangombwa byo kubaka inzu zigeretse gusa, hagamijwe gusigaza ubutaka bwo guhingaho.
Ni ibyagarutsweho n’Umunyamabanga wa Leta muri MININFRA, Olivier Kabera, aho agaragaza ko hagendewe ku miturire n’imyubakire ikomeje kwiyongera, mu mwaka wa 2050 ubutaka bwo guhingaho bwaba bwararangiye.
Ati” Twamaze kubona ko dukomeje kuri ubu buryo bugezweho, ubutaka bwo guhinga twabumara bitarenze 2050.”
Olivier Kabera avuga ko bimwe mu bice byiganjemo ibyo mu nkengero z’umujyi wa Kigali, byari bifite ubutaka bunini kuri ubu bwamaze gushira.
Ati” Dufashe urugero rworoshye hano i Kigali, mu minsi ya vuba wagendaga hano za Gikondo watera amaso Rebero ukabona ishyamba, ubu ryarashize […] Nahandi ukajya Bugesera, abantu barubaka, ujya ku Ruyenzi haruzuye, Shyorongi ngirango niho hasigaye.”
Olivier Kabera akomeza agaragaza ko MININFRA yasanze igisubizo cy’ubutaka bwamazwe n’imiturire, ari uko bashyiraho politiki yo kubaka inzu zigeretse.
Ati” Igisubizo nta kindi ni ukubaka abantu bazamuka, ubu dushaka kubishimangira, umuntu akajya ahabwa icyangombwa cyo kubaka Ari uko yubaka ajya hejuru.”
Yongeyeho ko abaturage bakangurirwa kugira umuco wo gufatanya inzu, bikunze kugaragara mu bihugu bya Aziya birimo Ubuhinde, aho abagize umuryango umwe bashobora kuba batuye mu nzu zifatanye, hasi no hejuru.
Ibi byongeye gushimangirwa n’Umujyi wa Kigali, mu butumwa bwasangijwe ku rubuga rwa X, ku wa kabiri, tariki ya 21 Mutarama, aho bagaragaza ko kugeza ubu umujyi wa Kigali utuwe n’abagera kuri 1.745.555.
Ibarura ryakozwe rigaragaza ko mu mwaka wa 2050, umujyi wa Kigali uzaba utuwe n’abagera kuri miliyoni enye, ndetse uburyo bwo gukemura ikibazo cy’imiturire ari uko abantu bahera ubu bubaka inyubako zigeretse.
