Minisiteri y’Ubuzima yatangaje ko iri kwiga ku buryo abajyanama b’ubuzima baba bamwe mu banyamuryango ba Muganga Sacco mu rwego rwo kurushaho kubateza imbere.
Ni ibyatangajwe na Minisitiri w’Ubuzima Dr. Sabin Nsanzimana, mu kiganiro yagiranye n’Abadepite bagize Komisiyo y’Imiyoborere, Uburinganire n’Ubwuzuzanye bw’Abagabo n’Abagore.
Minisitiri Dr. Nsanzimana agaragaza ko aya mavugurura azafasha mu gukemura ibibazo bigaragara mu makoperative y’Abajyanama b’ubuzima.
Ibi bibazo byagaragajwe na raporo y’umuvunyi ya 2023/2024, birimo kuba hari abajyanama b’ubuzima bataba mu makoperative, ndetse naya makoperative ubwayo ugasanga adacunga neza umutungo, cyangwa hakorerwamo ibihabanye n’ibyo baherewe uburenganzira n’ibindi.
Ibi Minisitiri Nsanzimana avuga ko bizakemurwa no gushyira abajyanama b’ubuzima muri Muganga Sacco.
Ati” Igishya muri aya mavugurura ni uko abajyanama b’ubuzima nabo bashobora kuyigana kandi Inama y’Ubutegetsi ya Muganga SACCO imaze iminsi ibyigaho natwe twasanze byafasha haba kuri bo ndetse no kuri Muganga SACOO kuko yaba igize abantu benshi.”
Uyu muyobozi akomeza agaragaza ko aya mavugurura azaba inzira nziza yo gukemura ibibazo no guteza imbere urwego rw’abajyanama b’ubuzima ndetse na Muganga SACCO nayo igakura ikagira abantu benshi.
Muganga Sacco yatangiye mu 2017, ikaba ari gahunda ya Leta Ishinzwe Kuzigama no Kugurizanya irimo abakora mu Nzego z’Ubuzima.
Kuri ubu ibarirwamo abanyamuryango basaga ibihumbi 12, mu gihe abajyanama b’ubuzima bashobora kuyinjizwamo babaribwa mu bihumbi 58.
