Minisiteri y’Ubuzima yatangaje ko muri iki gihe mu Rwanda hari ibyorezo ndetse no mu bihe bindi bisanzwe, abakora kwa muganga basabwa kwitwararika bakurikiza neza amabwiriza yo kwirinda ubwandu ndetse no kwirinda gukwirakwiza indwara.
Ku bitaro bitandukanye hahurira abarwayi n’abarwaza benshi kandi bakanahura n’abaganga batandukanye. Buri murwayi aba afite ikibazo kihariye, hari nubwo usanga hari ufite icyorezo atarabimenya ugasanga yanduje abo barikimwe cyangwa abamuvuye. Ni byiza ko habaho uburyo bwo kwirinda mu gihe k’ibyorezo.
Minisitiri w’Ubuzima, Dr. Sabin Nsanzimana avuga ko indwara zishobora kubonera icyuho mu kudakurikiza amabwiriza arebana no kwirinda ubwandu ndetse no gukwirakwiza indwara kwa muganga.
Akomeza agaragaza ko ibireba n’abaganga, abarwayi n’abandi bose bagera ku mavuriro, Minisiteri y’Ubuzima yemeza ko ibikoresho by’ubwirinzi bihari bihagije, bifasha abahakora kwirinda.
Iyi Minisiteri ivuga ko kuri ubu hari ibyongerewe mu mabwiriza arebana no kwirinda ubwandu no gukwirakwiza indwara, bakaba bakomeje kubiganiraho n’abakora umwuga w’ubuvuzi.
