Kuri uyu wa gatatu, tariki ya 15 Mutarama, Minisitiri w’Intebe, Dr Edouard Ngirente yitabiriye umuhango w’irahira rya Perezida wa Mozambique, Daniel Francisco Chapo.
Mu Ukwakira 2024, nibwo Daniel Francisco Chapo w’imyaka 48, wo mu ishyaka rya Frelimo ari naryo ryari risanzwe ku butegetsi, yatorewe kuyobora Mozambique n’amajwi 70,6%.
Kuri uyu wa gatatu nibwo Daniel Chapo yarahiye mu muhango witabiriwe n’abakuru b’ibihugu naza Guverinoma barimo Minisitiri w’Intebe w’u Rwanda, Dr Edourard Ngirente wagiye ahagarariye Perezida Paul Kagame.
U Rwanda na Mozambique ni ibihugu bifitanye imikoranire ya hafi n’amasezerano mu by’umutekano, uburezi, ubuzima no kubungabunga imibereho myiza y’abaturage.
Guhera mu 2021, u Rwanda rwatangiye kohereza ingabo zijya mu butumwa bwo kugarura amahoro no kurwanya ibyihebe mu ntara ya Cabo Delgado yo mu Burasirazuba bwa Mozambique.
Perezida Daniel Chapo ubwo yiyamamazaga yagaragaje ko yiteguye gushyira imbaraga mu bikorwa byo gukomeza kubungabunga umutekano muri Cabo Delgado.
