Minisitiri w’Ibidukikije, Dr. Uwamariya Valentine yagaragaje ko ibihugu byitabiriye inama yo kurengera ibidukikije, bigomba gufatanya mu kongerera ubushobozi ibikiri mu nzira y’Amajyambere, kugirango bibashe guhangana n’imihindagurikire y’ikirere.
Minisitiri Uwamariya yabigarutseho ubwo yagezaga raporo y’u Rwanda ivuga ku mihindagurikire y’ikirere, abitabiriye inama ya Cop29, yabereye i Baku muri Azerbaijan.
Yagaragaje ko nko mu Rwanda ihindagurika ry’ikirere ibangamira ubuhinzi, ibinyabuzima, n’ubuzima bw’abantu. Ku buryo dukurikije raporo iheruka y’iterambere ry’igihugu, imihindagurikire y’ikirere ishobora gutwara 5%- 7% by’umusaruro mbumbe w’Igihugu mu 2050.
U Rwanda rukeneye agera kuri miliyari 11 z’amadorari ya Amerika, mu guhinga mu nzu zabugenewe zizwi nka ‘Green House’, kugira ngo babashe guhangana n’ibihumanya ikirere ku gipimo cya 38%.
Yakomeje asaba abitabiriye inama ya Cop29, gushyiraho amahame agenderwaho mu guhangana no gukemura ibibazo by’imihindagurikire y’ikirere, n’ingaruka ziterwa nabyo.
Yagize ati “ Nk’ibihugu dukwiye guhura kenshi kugirango twungurane ibitecyerezo mu bijyanye n’imihindagurikire y’ikirere, tunige nuko twabicyemura vuba.”
Amasezerano agendanye no guhangana n’imihindagurikire y’ikirere no kurengera ibidukikije aherutse gusinywa i Paris mu Bufaransa, agaragaza ko hakwiwe gushyirwaho ingengo y’imari ikwiye guhabwa ibihugu bya Afurika, by’umwihariko ibiri mu nzira y’amajyambere mu guhangana n’imihindagurikire y’ikirere.
U Rwanda rwiyemeje gukorana n’ibindi bihugu mu gushaka ibisubizo birambye by’ibibazo bugendanye n’imihindagurikire y’ikirere, kugirango abahatuye batagirwaho ingaruka nayo.
