Minisitiri w’Ububanyi n’Amahanga n’Ubutwererane, Amb. Olivier Nduhungirehe, yagize icyo avuga ku bushyamirane bw’abaye hagati y’urubyiruko rwo mu Rwanda n’abanya- Sudani y’Epfo, agaragaza ko ubushyamirane butemewe mu Rwanda, ndetse n’amagambo aharabika anyuranyije n’indangagaciro z’igihugu.
Tariki ya 28 Ukuboza 2024, nibwo umunyarwanda ukoresha izina rya McKyle ku rubuga rwa X, yasangije ubutumwa avuga ko Abanyarwanda batatu bakubitswe n’abanya-Sudani y’Epfo 15, ibi byatumye abakoresha uru rubuga basaba ko aba banyamahanga bagira uburyo bahanwamo birimo kwirukanwa.
Nyuma yaho Polisi y’u Rwanda yasangije ubutumwa ivuga ko ibikorwa by’urugomo bitemewe, ndetse ko abantu bose baba abanyagihugu n’abanyamahanga basabwa kubahiriza amategeko, ubirenzeho agahanwa hakurikijwe amategeko y’Igihugu.
Ku munsi wakurikiyeho, McKyle, yongeye gutangaza ko amakuru yashyizwe hanze yari inkuru mbarirano, kuko akurikije amashusho ya CCTV Camera yasanze ubushyamirane bwaraturutse ku bushotoranyi ku mpande zombi, buturutse ku businzi.
Kuri uyu wa mbere, Minisitiri Nduhungirehe yasangije ubutumwa bugaruka kuri iyi sanganya avuga ko ‘Ubushyamirane mu rubyiruko budafite umwanya muri sosiyete nyarwanda, kandi amagambo yibasira Abanyesudani y’Epfo by’umwihariko anyuranyije n’indangagaciro nyarwanda.”
Yakomeje yibutsa Abanyarwanda muri rusanjye ko bagomba kurangwa n’ubworoherane bagendeye ku mateka yaranze igihugu, amakimbirane n’ivangura iryariryo ryose bigacibwa burundu.
Minisitiri Nduhungirehe yashoje asaba urubyiruko kwizihiza iminsi mikuru mu buryo buboneye, barangwa n’ituze n’ubwumvikane, kugirango barusheho gusigasira umutekano w’igihugu “ari na ko dukomeza kwakirana urugwiro urubyiruko ruturutse mu mahanga.”
