Minisitiri w’Intebe, Dr. Edouard Ngirente, yagiranye ibiganiro n’Umuyobozi Nshingwabikorwa wa Banki y’Isi mu bihugu bya Afurika 23, Zarau Kibwe, bigaruka ku kwagura imikoranire y’impande zombi.
Zarau Kibwe yagiriye uruzinduko mu Rwanda yakirwa na Minisitiri Ngirente, ku mugoroba wo ku wa gatatu, tariki ya 13 Ugushyingo 2024.
Zarau Kibwe ari mu Rwanda nk’Umuyobozi mushya uhagarariye Banki y’Isi mu Karere u Rwanda ruherereyemo, mu rwego rwo kunoza imikoranire na za guverinoma no kureba imbogamizi zikigaragaramo n’ibindi.
Uyu muyobozi witabiriye igikorwa u Rwanda rwifatanyijemo na Banki y’Isi rugaragaza inyigo ruzakoresha mu kuzamura ubukungu bw’igihugu, yavuze ko iyi Banki isanzwe ikorana n’ibihugu bitandukanye mu rwego rw’iterambere, yemeza ko ibiganiro bye na Minisitiri Ngirente byagarutse kuri iyo ngingo.
Ati “Twagiranye ibiganiro byiza na Minisitiri w’Intebe byibanze ku kurebera hamwe uburyo Bank y’Isi yakomeza gufasha u Rwanda mu guteza imbere urwego rw’abikorera, no gushyira mu bikorwa ibijyanye na guhunda yo kwihutisha iterambere ya NST2.”
Zarau Kibwe yashimye uko Banki y’Isi ikorana n’u Rwanda irutera inkunga mu mishinga irimo n’imishya, itanga icyizere mu kwihutisha iterambere, ndetse ashimangira ko bifuza kurushaho kuzamura inkunga mu birebana n’ubuhinzi bugezweho hagamijwe gutanga imirimo ku rubyiruko.
