Minisiti w’uburezi, Joseph Nsengimana yagaragaje ingamba zafashwe na Guverinoma y’u Rwanda mu kurushaho guteza imbere uburezi bwibanze ku bana bato, harimo kugaburira abana kw’ishuri no gushyiraho icyumba cy’abakobwa ku mashuri.
Ibi yabigarutseho kuri uyu wa kabiri tariki ya 12 Ugushyingo, mu nama Mpuzamahanga yiga ku guteza imbere ubumenyi bw’ibanze buhabwa abiga mu mashuri y’ibanze burimo gusoma, kwandika no kubara, yiswe “Africa Foundational Learning Exchange (FLEX 2024)”.
Iyi nama iri kubera muri Kigali Convection Center yitabiriwe na Madamu Jeannette Kagame n’abandi bayobozi n’abafite aho bahuriye n’iterambere ry’uburezi barenga 500, baturutse mu bihugu bitandukanye bya Afurika.
Minisitiri w’uburezi Joseph Nsengimana yagaragaje ko u Rwanda rwashyizeho gahunda yo kugaburira abana kw’ishuri nk’imwe mu ngamba zo guteza imbere uburezi.
Ati” Igikomeye twakoze ni ugushyiraho gahunda yo kugaburira abana ku mashuri yatumye ubuzima bw’abana bacu burushaho kuba bwiza, bifasha mu kongera umubare w’abana bitabira ishuri binagabanya abata ishuri.”
Mu gufasha abana b’abakobwa kwitabira ishuri hashyizweho icyumba cy’umukobwa, aho abakobwa bashobora kubonera serivisi zijyanye n’ubuzima bw’imyororokere, ibi bigatuma biga batekanye bikabafasha mu gutsinda.
Ibyakozwe bindi mu guteza imbere uburezi bw’ibanze harimo kongeza imishahara abarimu kuva mu myaka ibiri ishize no kongera ibikoresho byifashishwa mu kwigisha.
Muri Werurwe 2022, nibwo Leta y’u Rwanda yashyizeho ingingo zizafasha kugabanya umubare w’abana bata ishuri.
Muri izi ngingo harimo gahunda yo kugaburira abana kwishuri bise ‘Dusangire Lunch’, kongera ibyumba by’amashuri kugirango hagabanywe ubucucike n’ingendo ndende bakoraga, ndetse no kongera umubare w’abarimu n’ibikoresho.
Dusangire Lunch yashyizweho hagamijwe kugaburira abana bari kwishuri kugirango badasonza bityo bigatuma biga neza, kubaka ubusabane hagati y’abana, by’umwihariko bakaboneraho kurandura ikibazo cy’imirire mibi.
Kuri iyi gahunda, Leta yishyura 90% y’ikiguzi nkenerwa kugira ngo umwana ashobore kubona ifunguro ku ishuri, ni mu gihe ababyeyi batanga umusanzu wagera ku 1000 Frw buri gihembwe kugirango iyi gahunda irusheho kugenda neza.
