Minisitiri w’Ubucuruzi n’Inganda, Prudence Sebahizi, ari i Bujumbura mu Burundi aho yahagarariye Perezida Kagame mu Nama y’abakuru b’ibihugu bihuriwe mu isoko rusange rya Afurika y’iburasirazuba n’iy’amajyepfo (COMESA), izaba tariki ya 31 Ukwakira 2024.
Aya makuru yemejwe na Minisiteri y’Ubucuruzi n’Inganda, mu itangazo yanyujije ku rubuga rwa X, ku wa 29 Ukwakira 2024, avuga ko Minisitiri Sebahizi azaba yitabira inama ya COMESA yiga ku bufatanye bw’ibihugu bigize uyu muryango mu guteza imbere ubukungu.
Itangazo riragira riti” Minisitiri Prudence Sebahizi ari i Bujumbura, aho ahagarariye Nyakubahwa Perezida wa Repubulika y’u Rwanda mu nama ya 23 y’abakuru b’ibihugu na za guverinoma ya COMESA, yabanjirijwe n’iya 19 y’abaminisitiri b’ububanyi n’amahanga.”
Iyi nama izaba iganira ku bibazo bitandukanye bikigaragara muri Afurika birimo ubukungu buhungabanywa n’imihindagurikire y’ikirere, uburyo bwo kongerera agaciro ibikoresho bituruka mu bihugu bigize uyu muryango, ndetse n’uburyo hashakirwa urubyiruko imirimo binyuze mu bucuruzi bw’amabuye y’agaciro n’ubukerarugendo.
Muri iyi nama Perezida wa Zambia Hakainde Hichilema azahererekanya inshingano zo kuyobora COMESA yaramazeho umwaka na Perezida w’u Burundi, Evariste Ndayishimiye.
