Minisitiri w’Ubucuruzi n’Inganda, Prudence Sebahizi yasabye abikorera n’abashoramari mu Karere ka Nyagatare, kubyaza umusaruro amahirwe yo gushoramo imari, bibanda ku mishinga izabageza ku ntego ya NST2.
N’ibyo yagarutseho mu ihuriro rya ‘Nyagatare Investment Forum”, ryabaye kuri uyu wa gatanu, tariki ya 22 Ugushyingo 2024, ryahuje abayobozi b’ibigo bya Leta, abikorera n’imiryango itegamiye kuri Leta, hagamijwe kuganira ku mahirwe y’ishoramari aboneka muri aka karere.
Minisitiri Sebahizi yabwiye abitabiriye iri huriro ko bagomba kubyaza umusaruro amahirwe aboneka mu karere ka Nyagatare yo gushora imari, kugirango barusheho kugira uruhare mu iterambere ry’igihugu.
Yibukije abikorera ko Leta yashyize imbaraga mu kubaka ibikorwaremezo no korohereza abashoramari, abasaba ko bagomba kubyaza umusaruro aya mahirwe.
Minisitiri Sebahizi yabibukije ko bagomba kuzirikana gukora imishinga izafasha mu kugera ku ntego z’icyiciro cya Kabiri cya gahunda y’Igihugu yo kwihutisha iterambere, NST2.
