Minisitiri w’Urubyiruko n’Iterambere ry’Ubuhanzi, Dr. Utumatwishima Jean Nepo Abdallah, yageneye ubutumwa umufana washinje umuhanzi Chriss Eazy gushishura indirimbo ‘Sambolela’.
Umwe mu bakoresha urubuga rwa X, ukoresha amazina ya Caguwa, yanditse kuri uri rubuga agaya umuhanzi Nyarwanda Chriss Eazy gushishura indirimbo ‘Sambolela’, indi y’umuhanzi Franco yitwa ‘Mario’.
Mu butumwa bwe yanditse ati “Ibi bintu birababaje. Ibaze kuba uri umuhanzi warangiza ugashishura amashusho y’ibyakozwe n’abandi, ntibirangirire aho ahubwo ugashishura n’indirimbo.”
Mu bagize icyo bavuga ku butumwa bwa Caguwa harimo Minisitiri Utumatwishima wasangije ubutumwa bwe agereranya ibyakozwe n’uko igihugu nka Singapore cyateye imbere kirebeye ku bindi bihugu nka Amerika n’u Burayi.
Yagize ati” Kera twigeze kubaza ukuntu Singapore yateye imbere ikihuta cyane. Icya mbere yanze guhimba ibintu byose bishya, icya kabiri ifata urubyiruko irwohereza mu Buyapani, Leta Zunze Ubumwe za Amerika, i Burayi n’ahandi kwiga uko ikoranabuhanga na serivisi bikorwa.”
Yakomeje agira ati” Ibyo abahanzi n’abandi bahanga bakora byo guhera ku byahimbwe n’abandi ni amahame yemewe. Gusa bajye bibuka kubahiriza amahame angenga igihangano bwiye cy’umuntu.”
Chriss Eazy aherutse gushyira hanze amashusho y’indirimbo yise ’Sambolela’, yatunganyijwe mu buryo bw’amajwi na label ya 1:55Am, naho amashusho atunganywa n’uyu muhanzi.
