Minisitiri w’Ububanyi n’Amahanga n’ubutwererana, Amb Olivier Nduhungirehe yatangaje ko Ambasade y’u Rwanda muri Mozambique yafunzwe by’agateganyo mu gihe cy’iminsi ibiri, kubera imyigaragambyo yakurikiye amatora y’Umukuru w’Igihugu ndetse ko Abanyarwanda bariyo basabwe kuba bagumye mu rugo.
I Maputo mu murwa mukuru wa Mozambique hamaze iminsi hari imyigaragambyo yatangijwe n’Abatavugarumwe n’ubutegetsi batemeranya n’ibyavuye mu matora y’Umukuru w’Igihugu, yegukanywe na Daniel Chapo wari usanzwe ari ku butegetsi.
Minisitiri Nduhungirehe ubwo yari mu kiganiro na TV10, ku wa kabiri tariki ya 5 Ugushyingo 2024, yatangaje ko Ambasade y’u Rwanda i Maputo muri Mozambique yabaye ifunze mu gihe cy’iminsi ibiri, ndetse ko Abanyarwanda bariyo basabwa kuba bagumye mu rugo.
Ati” Tukaba twagiriye inama ambasade yacu kuba ifunze ndetse tukaba twanagiriye inama Abanyarwanda, cyane cyane abacuruzi ba hariya kudafungura amaduka yabo, uyu munsi n’ejo. Twebwe rero icyo twifuza ni uko Abanyarwanda bagira umutekano, kandi batakwishyira mu kaga, ni yo mpamvu tubasaba kuba bagumye mu rugo muri iyi minsi ibiri.”
Umuvugizi Wungirije wa Guverinoma y’u Rwanda, Alain Mukuralinda, aherutse gutangaza ko nta Munyarwanda urahitanwa n’izi mvururu ndetse ko Leta y’u Rwanda izakomeza kwita ku Banyarwanda bariyo binyuze muri Ambasade.
