Ikigo Ntarama Pig Farming On Grande Scale, gikorera mu Karere ka Bugesera cyungutse ibagiro rigezweho rifite ubushobozi bwo kubaga ingurube 50 ku munsi, ryitezweho kongera umusaruro w’inyama zitunganyijwe mu buryo bunoze.
Iri bagiro ririmo imashini 47 zifite ubushobozi bwo gutunganya inyama y’ingurube uhereye ku buryo bayica, uko ibagwa bituma inyama zitandura; rinafite imashini ziharura ingurube, izishinzwe kuyikata ndetse n’igice cy’aho zikonjesherezwa.
Umuyobozi wa Ntarama Pig Farming, Niyoyita Peace, yabwiye Umunota ko iri bagiro rigiye kongera isoko ry’abantu bakenera ingurube by’umwihariko abaturiye ibice bya Bugesera n’Umujyi wa Kigali.
Yagize ati “Akarere kacu ka Bugesera ntabwo kagiraga ibagiro ry’ingurube. Dufitanye imikoranire n’abandi borozi babaga ingurube kuko ariho bagiye kujya babagira ingurube zabo, ukeneye kubagisha aze abikore mu buryo bwiza bugezweho. Murabizi ko hari ibibazo by’inshi by’inyama zitujuje ubuziranenge kubera kuzibagira aho babonye.”
Yagaragaje ko iri bagiro ari igisubizo ku borozi n’abandi bakora ubucuruzi bw’inyama z’ingurube, kuko umusaruro wabo ugiye kwiyongera, kandi ufite ubuziranenge bityo bakabasha guhaza isoko.
Ati “Aborozi bagiye kugira umutekano mu byo bakora, umuntu agiye korora azi ko hari isoko, bazajya batuzanira ingurube zabo tuzigure tuzibabagire. Ikindi tuzajya dutanga serivisi zo kubagira abafite amahoteli, akabari, azane ingurube ze twe tuzimubagire, yishyure serivisi y’ibagiro, ajye gutanga inyama nziza zabagiwe ahantu heza.”
Niyoyita yavuze ko iyi ari serivisi izatuma n’abakunda inyama y’ingurube bayirya batekanye, kuko bazajya baba bizeye ko zatunganyirijwe ahantu hameze neza, ndetse bigakemura n’ikibazo cy’imirire mibi, by’umwihariko muri iki gihe Leta y’u Rwanda ishishikariza abantu kurya indyo yuzuye.
Aborozi b’ingurube mu Bugesera bahuraga bahuraga n’imbogamizi zo korora ariko ntibabone aho batunganyiriza umusaruro wabo.
Indi mbogamizi yavuzwe mu bucuruzi bw’inyama z’ingurube ni uko benshi batabonaga aho bazibagira, aho wasangaga bamwe babikorera mu bisambu n’amashyamba, bigatuma ubuziranenge bwazo bukemangwa.
Niyoyita umaze imyaka irindwi akora ubworozi bw’ingurube yagize ati “Nategerezaga abantu baza bakambwira ko bakeneye ingurube rimwe na rimwe bakaza tubakeneye cyane kuko twabaga dufite umusaruro mwinshi, bigatuma baduhenda.”
Iri bagiro riri mu Mujyi wa Bugesera rizajya ryakira amasoko aturutse mu turere tuhakikije turimo Nyanza, Rwamagana, Gisagara, abo mu mujyi wa Kigali ndetse no mu nkengero zawo.
Inyama z’ingurube cyangwa izo benshi bita akabenzi, zikunze kuribwa n’abantu batandukanye mu tubari cyangwa mu mahoteli, ariko usanga ku rundi ruhande hari umubare munini w’abantu bazifuza ariko bakagorwa no kuzibona cyane ko hari n’abadafite ubumenyi buhagije bwo kuzitekera mu ngo zabo.
Ntarama Pig Farm ifite gahunda yo kwigisha abantu uburyo inyama z’ingurube zitunganywa ndetse zigatekerwa mu rugo, mu rwego rwo kongera isoko ryabo haba imbere mu gihugu no hanze yacyo.
