Ikigo cy’Igihugu Gishinzwe Ibizamini n’Ubugenzuzi bw’Amashuri mu Rwanda, NESA cyatangaje ko amanota asoza icyiciro cy’Amashuri y’isumbuye cya 2023/2024 azashyirwa hanze muri uku Gushyingo.
Ni itangazo NESA yacishije ku rubuga rwa X kuri uyu wa gatanu, tariki ya 8 Ugushyingo 2024, rivuga ko amanota yabashoje icyiciro cy’Amashuri yisumbuye azasohoka tariki ya 15 Ugushyingo 2024, saa tanu za mu gitondo.
Iri tangazo rigira riti” Ikigo cy’igihugu gishinzwe ibizamini n’ubugenzuzi bw’amashuri mu Rwanda (NESA) kiramenyesha abantu bose ko amanota y’ibizamini bya Leta bisoza umwaka w’amashuri wa 2023/2024 azatangazwa ku wa Gatanu, ku itariki ya 15 Ugushyingo 2024, akazasohoka i 11:00 za mugitondo.”
Umwaka w’amashuri 2023/2024, Abanyeshuri 56,537 nibo bakoze ibizamini bisoza ikiciro cy’amashuri y’isumbuye barimo abahungu 23,651 n’abakobwa 32 886 bo mu bigo byamashuri 857.
Abanyeshuri biga imyuga n’ubumenyi ngiro bakoze ibizamini bisoza amashuri yisumbuye bangana na 30922, barimo abahungu 16845 n’abakobwa 14080 bo mu bigo 331.
Abo mu mashuri nderabarezi (TTC) bakoze ibizamini bisoza amashuri yisumbuye bangana na 4068 barimo abahungu 1798 n’abakobwa 2270, baturuka mu bigo 16, mu gihe amasomo ajyanye n’ubuforomo (ANP) ari 203 barimo abahungu 114 n’abakobwa 89 bo mu bigo birindwi.
