Ikigo cy’Igihugu Gishinzwe Ibizamini n’Ubugenzuzi bw’Amashuri (NESA) yatangaje gahunda yo gutangira ibizamini bya Leta by’umwaka w’amashuri wa 2024-2025. Ibi bizamini bizakorwa hagati y’ukwezi kwa Kamena n’ukwezi kwa Nyakanga 2025.
Nk’uko NESA ibitangaza, ibizamini bisoza amashuri abanza (PLE) bizatangira ku itariki ya 30 Kamena kugeza tariki ya 3 Nyakanga 2025.
Ibizamini bisoza icyiciro rusange (S3) biteganyijwe kuva tariki 9 Nyakanga kugeza tariki 16 Nyakanga, kimwe n’ibizamini by’abarangiza icyiciro cya kabiri cy’amashuri yisumbuye (S6) mu mashuri rusange no mu mashami y’icungamutungo (accounting).
Abanyeshuri biga mu mashuri y’abarimu (TTCs) bazakora ibizamini kuva tariki 9 Nyakanga kugeza 18 Nyakanga 2025, naho abiga mu ishami rya Associate Nursing Programme bazakora kuva tariki 9 kugeza tariki 17 Nyakanga 2025, rimwe n’abiga mu mashuri y’imyuga n’ubumenyingiro (TVET).
Ibizamini byanditse bizakurikira ibizamini ngiro byatangiye tariki ya 19 Gicurasi bikazasozwa tariki ya 6 Kamena 2025, aho harimo abiga icungamutungo, ubuforomo, siyansi ndetse n’abiga imyuga.
Abanyeshuri 471,009 bo mu mashuri abanza, icyiciro rusange n’icyiciro cya kabiri cy’amashuri yisumbuye nibo biyandikishije gukora ibizamini by’uyu mwaka, nk’uko byemejwe na Minisiteri y’Uburezi.
NESA yatangaje ko mu mwaka w’amashuri wa 2023-2024, habayeho igabanuka ry’abatsinze ibizamini by’igihugu ugereranyije n’imyaka yabanje.
Aho igaragaza ko mu mashuri rusange (general education), abatsinze bari 67.5%, mu gihe umwaka wabanje bari 95%. Mu mashuri y’imyuga (TVET), abatsinze bari 96.1%, mu gihe umwaka wabanje bari 97.65%.
Mu mashami y’uburezi bw’umwuga (professional education), abatsinze bari 98.1%, bavuye kuri 99.7% naho TTCs, amashuri y’abarimu nayo ari mu cyiciro cyagize 78.6 by’abanyeshuri batsinze.
