Kuri uyu wa kabiri, tariki ya 3 Ukuboza 2024, Urukiko rwa Gisirikare rwatangiye kuburanisha mu ruhame, urubanza ruregwamo Sergeant Minani Gervais, warashe abaturage batanu bo mu Karere ka Nyamasheke.
Urubanza rwa Sergeant Minani Gervais ruri kubera i Rushyarara mu Murenge wa Karambi, aho icyaha cyabereye.
Mu ijoro ryo ku wa 13 Ugushyingo 2024, Sergeant Minani Gervais, w’imyaka 39 y’amavuko, yarashe abaturage batanu aho bari mu kabari, bahita bapfa.
Aba baturage ni Benemugabo Denis w’imyaka 17, Habumugisha Onesphore w’imyaka 20, Muhawenimana Jonas w’imyaka 35, Sindayiheba Zephanie w’imyaka 44 na Nsekambabaye Ezira w’imyaka 51.
Bidatinze RDF yahise itangaza ko Sergeant Minani Gervais, yatawe muri yombi, ndetse yizeza abaturage ko uwakoze icyaha ari gukurikiranwa kugirango aryozwe ibyaha yakoze, ndetse yihanganisha ababuze ababo ibizeza ubutabera.
