Patrick Namenye wari umaze imyaka ibiri n’amezi atatu ari Umunyamabanga Mukuru wa Rayon Sports, yasezeye ku mirimo ye kuri uyu wa kane, tariki ya 14 Ugushyingo 2024.
Patrick Namenye yinjiye muri Rayon Sports mu 2021 ashinzwe kumenyekanisha ibikorwa, tariki ya 1 Kanama 2022 nibwo yagizwe umunyamabanga mukuru (SG) w’iyi kipe itazirwa izina rya Gikundiro.
Mu kiganiro Namenye yagiranye n’Umunota, yasobanuye ko n’ubwo asezeye ku bakunzi ba Rayon Sports, ariko azakomeza gukora akazi kugera ku itariki 30 Ugushyingo 2024.
Ati “Nifuje gusezera abakunzi ba Rayon Sports mbere, ariko nzasoza akazi ku itariki 30 Ugushyingo 2024. Nasabye ubuyobozi gusezera, barabinyemerera. Nzakomeza gushyigikira ibikorwa bya Gikindiro.”
Ni mu gihe ikipe ya Rayon Sports yitegura inteko rusange y’amateka izaba ku wa gatandatu, tariki ya 16 Ugushyingo 2024, izatorerwamo abagize komite Nyobozi nshya, isimbura icyuye igihe yari iyobowe na Uwayezu Jean Fidèle uherutse kwegura kuri iyi mirimo.
Amakuru avuga ko iyi Nteko rusanjye izabera mu Nzove ku cyicaro gikuru cy’uruganda rwa SKOL, isanzwe ari umufatanyabikorwa wa Rayon Sports.
Inteko Rusanjye ya Rayon Sport izitabirwa n’abayobozi b’ama Fan Clubs cyangwa abatumiwe kubahagararira, akaba ari nabo bemerewe gutora ndetse no gutorwamo umuyobozi.
