Domitilla Mukantaganzwa wagizwe Perezida mushya w’Urukiko rw’Ikirenga yashimiye Perezida Kagame wamugiriye icyizere.
Yifashishije urubuga rwa X, uyu muyobozi mushya yavuze ko azakorana ubunyangamugayo, umurava no kwiyemeza muri izi nshingano yahawe no kuyobora urwego rw’ubutabera.
Kuri uyu wa kabiri, tariki ya 3 Ukuboza 2024, nibwo Perezida Paul Kagame yashyize mu myanya Perezida w’Urukiko rw’Ikirenga, Madamu Domitilla Mukantaganzwa, na Visi Perezida wuru rukiko, Bwana Alphonse Hitiyaremye.
Aba bayobozi bashyizwe mu myanya hagendewe ku biteganywa n’Itegeko Nshinga rya Repubulika y’u Rwanda, ingingo yaryo ya 154.
Mukantaganzwa Domitilla yagizwe Perezida w’Urukiko rw’Ikirenga asimbuye Nteziryayo Faustin, akaba yari asanzwe ari Perezida wa Komisiyo y’u Rwanda ishinzwe ivugururwa ry’amategeko kuva mu 2019.
