Perezida wa Repubulika Iharanira Demokarasi ya Congo, RDC, yavuze ko atazigera na rimwe ahurira ku meza y’ibiganiro bigamije kwimakaza amahoro n’Umutwe wa M23, ufatwa nk’urwanya ubutegetsi bwe.
Yabitangarije mu birori yakiriyemo abadipolomate bahagarariye ibihugu bitandukanye muri RDC, byabaye kuri uyu wa Gatandatu, tariki ya 18 Mutarama 2025.
Perezida Félix Tshisekedi yashimangiye ko atazigera na rimwe aganira na M23 ngo hashakwe umuti ku ntambara ihanganishije uyu mutwe n’Ingabo z’igihugu cye, FARDC.
Yagize ati “Kuganira n’Umutwe wa M23, ni umurongo utukura tutazarenga. Kutwumvisha ko ari ngombwa gukora ibiganiro na M23, bisa nko kudusaba kwemeza ko ibikorwa bihonyora amategeko yacu n’ibyo dufata nka kirazira, ari ibisanzwe.”
Perezida Tshisekedi yagaragaje ko batazemera guca bugufi imbere y’ababotsa igitutu ngo bemere ibyo babasaba binyuranye n’inyungu z’igihugu cye.
Yavuze ko RDC ifite umuhate wo kubahiriza amasezerano ya Luanda, ahuriweho n’u Rwanda na RDC, mu gushakira umuti urambye ikibazo cy’umutekano muke mu Burasirazuba bwa Congo.
Mu Ntara ya Kivu y’Amajyaruguru muri RDC hakomeje kuvugwa imirwano hagati y’Ingabo za Leta, FARDC, zifatanya n’imitwe ya Wazalendo, Ingabo z’u Burundi n’Umutwe wa AFC – M23.
Umuryango utegamiye kuri Leta, Nouvelle Société Civile Congolaise (NSCC), ukorera muri Masisi, uvuga ko kuva aho iyo mirwano yuburiye, abaturage bakomeretse babarirwa muri 200 mu gihe abishwe barenga 60.
Ku wa 4 Mutarama 2025 ni bwo Umutwe wa M23 wigaruriye Umujyi wa Masisi, FARDC yongera kuwisubiza hashize iminsi itatu ariko M23 iwusubira nyuma y’icyumweru.
Akarere ka Masisi gafite ubutunzi bushingiye ku buhinzi n’ubworozi n’amabuye y’agaciro. Gatuwe n’abantu barenga ibihumbi 40, ikaba iri mu bilometero 80 uvuye mu Mujyi wa Goma.
M23 yavutse mu 2012 ndetse itangiza urugamba, isaba RDC kubahiriza amasezerano yagiranye n’abahoze mu Mutwe wa CNDP, yo gusubiza Abanye-Congo bo mu bwoko bw’Abatutsi, uburenganzira bw’ubwenegihugu bambuwe no guhagarika ubugizi bwa nabi bakorerwa.
Kuva mu 2012 kugeza mu 2013, M23 yafashe ibice byinshi muri Kivu y’Amajyaruguru birimo n’Umujyi wa Goma ariko ibivamo hashingiwe ku mwanzuro wafashwe n’abakuru b’ibihugu byo mu Karere.
Isezerano M23 yahawe ryagarukiye mu magambo kuko RDC itaryubahirije, byatumye nyuma y’imyaka 8 abari abarwanyi b’uyu mutwe, mu Ugushyingo 2021, bagabweho ibitero n’ingabo za Leta, bikongeza imirwano bushya.
U Rwanda rushinjwa ko rufasha M23 mu gihe rwo rugaragaza ko ari RDC ari yo ikwiye gukemura ikibazo cy’aba benegihugu baharanira uburenganzira bwabo.
