Perezida w’Ishyirahamwe ry’Umukino wo Gusiganwa mu Modoka ku Isi (FIA), Mohammed Ben Sulayem, yatanze ikaze ku bazitabira Inteko Rusange yayo n’ibirori byo guhemba abakinnyi bizabera i Kigali.
Inteko Rusanjye ya FIA iteganyijwe i Kigali, mu Rwanda, ku wa 9-13 Ukuboza 2024, ikazaberamo n’ibindi bikorwa birimo gutanga ibihembo ku bitwaye neza muri Formula 1.
Mu mashusho yasangijwe n’Urwego rw’Igihugu Rushinzwe Iterambere (RDB), yifashishije urubuga rwa X, agaragaza Mohammed Ben Sulayem avuga ko ari amateka kuba inteko rusanjye ya FIA igiye kubera muri Afurika, mu Rwanda.
Ati” Amateka akomeje kwiyandika aho ku nshuro ya mbere Inteko Rusange Ngarukamwaka yacu izabera muri Afurika, mu Mujyi wa Kigali mu Rwanda. Igihe muzamara muri iki gihugu cyiza cyo muri Afurika twizeye ko kizabasigira urwibutso rutazibagirana.”
Mohammed Ben Sulayem yavuze ko ku bifuza kuzatinda mu Rwanda, Visit Rwanda izabafasha mu kubona ibyiza nyaburanga birimo gusura Pariki y’Ingagi n’ibindi.
Yongeyeho ati” Igihe muzamara muri iki gihugu cyiza cyo muri Afurika twizeye ko kizabasigira urwibutso rutazibagirana.”
Inteko Rusanjye ya FIA izaba yizihiza imyaka 120, ikaba ari inshuro ya mbere igiye kubera muri Afurika, aho bazaba barebera hamwe uko umwaka ushize wagenze, banategura utaha.
