Umuvugizi wa Polisi y’u Rwanda, ACP Boniface Rutikanga, yavuze ko abantu badakwiye gukurwa umutima n’ikoreshwa ry’utudege tutagira abapilote ‘Drones’ mu gucunga umutekano, agaragaza ko zizajya zikoreshwa aho biri ngombwa hose.
Ni ibyo yagarutseho ubwo yari mu Kiganiro Waramutse Rwanda kuri RBA, mu gitondo cyo kuri uyu wa Kabiri, agaragaza ko ikoreshwa rya drones mu gucunga umutekano ryagiye rifasha mu gutahura ibyibwe ndetse bigasubizwa ba nyirabyo.
ACP Rutikanga yavuze ko gukoresha ‘drones’ bibafasha kubona amakuru y’ukuri no gufata ibyemezo bigendanye na yo.
Ati “Polisi ntigomba gusubira inyuma. Uyu munsi no mu gucunga umutekano hari ikoranabuhanga. Abapolisi ntibazabera hose icyarimwe, ariko hari ikoranabuhanga ryakoreshwa mu kuhacunga.”
Yabwiye abantu ko badakwiye gukurwa umutima n’ubu buryo bushya bugiye kujya bukoreshwa kenshi bwo kwifashisha drones.
Yakomeje ati “Twebwe icyo dukora ni ukuburizamo, ni ukugira ngo abantu aho bari bumve batekanye. Ituze, umutekano w’abantu n’ibintu ni cyo cy’ibanze.”
Umuyobozi ushinzwe Ubucukuzi mu Kigo Gishinzwe Mine, Peteroli na Gaz mu Rwanda (RMB), Nsengumuremyi Donath, yagaragaje ko drones ari uburyo bwagiye bukoreshwa mu gukurikirana ibikorwa by’ubucukuzi bw’amabuye y’agaciro ndetse bugatanga umusaruro.
Umusesenguzi mu by’Ikoranabuhanga, Rulinda Lambert, yavuze ko abantu badakwiye guhangayikishwa nuko Polisi iri gukoresha drones, ati” Kuba polisi yakoresha drones ntabwo byankura umutima kurusha kuba undi muntu yaba ayikoresha ku ruhande.”
Polisi y’u Rwanda igaragaza ko ubu ari uburyo buzajya bwifashishwa mu gucunga umutekano aho biri ngombwa, ndetse bigaragara ko bikenewe, mu gihe cya ngombwa.
