Ikigo cy’Igihugu gishinzwe Ubuzima, RBC, cyahumurije abantu ko nta ndwara idasanzwe y’ibicurane yagaragaye mu gihugu, ko ari ibicurane bisanzwe bibaho mu bihe by’intangiriro z’umwaka bikunze kurangwa n’ubukonje.
Ni nyuma y’uko Minisiteri y’Ubuzima isangije ubutumwa ku rubuga rwa X yibutsa abantu kurushaho kwirinda indwara y’ibicurane iri mu bwoko bwa ‘Influenza A’ ikunze kugaragara mu gihe cy’ubukonje.
Umuyobozi w’Ishami rishinzwe kurwanya Indwara z’Ibyorezo muri RBC, Dr. Rwagasore Edson, yabwiye Radio Rwanda yavuze ko nta bwoko bushya bw’ibi bucurane bwagaragaye, ahubwo bagamije kwibutsa abantu kwirinda ibisanzwe no kwivuza kare.
Ati “Icy’ingenzi ni ukugira ngo tumenyeshe abantu ko nta gikuba cyacitse kuko mu bihe nk’ibi by’umwaka hasanzwe hagaragaramo indwara y’ibicurane.”
Yakomeje agaragaza ko abantu benshi bakunze kurwara ibicurane ntibajye kwa muganga, avuga ko bikwiriye ko uyirwaye ajya kwa muganga mu gihe yumwa atangiye kuremba.
Ubwoko bw’ibicurane buzwi nka ‘Influenza A’ bukunze kwibasira abantu mu bihe by’ubukonje by’umwihariko abana bari munsi y’imyaka itanu, abagore batwite ndetse n’abasheshe akanguhe bafite imbaraga nke.
Ibimenyetso by’iyi ndwara ni ukumva ukonje, gukorora, kubabara umutwe, gucika intege, kubabara mu muhogo, guhumeka nabi no kuruka no gucibwamo ku bana bato.
Minisiteri y’Ubuzima yakanguriye abantu kwivuza kare mu gihe biyumvisemo ibicurane, gukaraba intoki kenshi n’amazi meza n’isabune no kwirinda kwegerana n’uyifite mu rwego rwo kwirinda ikwirakwizwa ryayo.
