Aborozi bo mu Karere ka Kayonza, Gatsibo na Nyagatare bemerewe kuzajya bahira ubwatsi bw’amatungo yabo mu kigo cya Gisirikare cya Gabiro, mu rwego rwo kongera umusaruro w’amata.
Ni itangazo ryashyizwe hanze n’urwego rw’ingabo z’u Rwanda, kuri uyu wa gatatu, tariki ya 13 Ugushyingo 2024.
RDF yatangaje igihe runaka aba borozi bazajya bahira ubwatsi ndetse n’inzira zizajya zikoreshwa binjira cyangwa basohoka.
Abo mu karere ka Gatsibo bazajya bakoresha inzira eshatu zirimo Munini/Gikobwa, Munini/Nyamwiza, na Nyamatete, abo mu karere ka Nyagatare bazajya bakoresha inzira ebyiri ebyiri, ari zo Shimwa Paul na Zubarirashe; mu gihe abo muri Kayonza bazajya bakoresha Mutumba na Gakoma.
Aborozi bo mu Murenge wa Munini, Akagari ka Gikobwa bashimiye RDF ku bufatanye bwayo mu kubemerera kwahira ubwatsi bw’amatungo bagaburira inka zabo.
RDF nayo yavuze ko iri gukorana n’inzego z’ibanze na Minisiteri y’Ubuhinzi mu kunoza ishyirwa mu bikorwa ry’iyi gahunda.
Iyi gahunda igamije gufasha abaturage kuzuza ibyifuzo byabo, kubungabunga umutekano w’aho batuye, no kwirinda ko hagira ibibazo byavuka mu gihe cy’imyitozo.
