Umuvugizi w’Ingabo z’u Rwanda, Brig Gen Ronald Rwivanga, yemeje amakuru y’umusirikare St Minani Gervais warashe abantu batanu mu karere ka Nyamashenge, atangaza ko biteguye kumukurikirana mu mategeko.
Kuri uyu wa gatatu, tariki ya 13 Ugushyingo 2024, Ingabo z’u Rwanda zatangaje ko umusirikare witwa St Minani Gervais, w’imyaka 39 yishe arashe abasivile batanu, bo mu Murenge wa Karambi, mu Karere ka Nyamasheke, ndetse akaba yamaze gutabwa muri yombi.
Umuvugizi w’Ingabo z’u Rwanda, Brig Gen Ronald Rwivanga, yemereye RBA aya amakuru, ahamya ko St Minani ari gukurikiranwa ndetse ko RDF yafashe ingamba zikwiye zo kumukurikirana mu nzira z’amategeko.
Yakomeje asobanura ko bataramenya icyamuteye kurasa aba bantu, ati” Umusirikare araza kubibazwa, ari mu maboko yacu turaza kumenya gahunda Zari zimujyanye muri ako kabari, turacyabikurikirana.”
RDF yemeje ko irakomeza gukurikirana St Minani agafatirwa ingamba zifatika kuko “ Nta mpamvu yatuma arasa abantu”, akaba ariyo mpamvu hari bufatwe ingamba zishoboka zose.
Brig Gen Ronald Rwivanga yahumurije abaturage bo mu karere ka Nyamasheke, by’umwihariko umuryango n’inshuti by’ababuze ababo.
