Mu Karere ka Rubavu, ku nyengero z’ikiyaga cya Kivu, hatashywe icyambu cya mbere kinini kizafasha mu koroshya ubucuruzi bwambukiranya umupaka w’u Rwanda na Repubulika Iharanira Demukarasi ya Congo.
Ni igikorwa cyabereye mu murenge wa Nyamyumba, mu karere ka Rubavu kuri uyu wa gatanu, tariki ya 6 Ukuboza 2024, cyitabiriwe na Minisitiri w’Ibikorwaremezo, Dr Jimmy Gasore, Ambasaderi w’u Buholandi mu Rwanda, Joan Wiegman n’abandi bayobozi mu nzego zitandukanye.
Iki cyambu cyari gisanzwe gikora mu buryo bw’igerageza kuva umwaka ushize, cyakira byibura abarenga miliyoni ebyiri buri mwaka, ndetse gishobora kwakira amato manini abiri ya DWT 500.
Icyambu cya Rubavu ni kimwe mu byambu bine byateguwe kubakwa hafi y’ikiyaga cya Kivu, kikaba cyuzuye gitwaye miliyoni icyenda z’Amadorari ya Amerika. Ibindi bizubakwa ni icya Rusizi kigeze kuri 51%, nicya Nkora na Karongi bizatangira kubakwa mu 2025.
Abatuye mu Karere ka Rubavu bishimira ko iki cyambu gishya kizoroshya ubucuruzi hagati y’u Rwanda na RDC, ndetse kigafasha mu kongera abasura n’abagenda muri aka Karere. Si ibi gusa kuko n’abaturage biteze kuzahabona amahirwe y’akazi.
