Urwego wIgihugu rushinzwe kugenzura imikorere y’inzego zimwe z’imirimo ifitiye Igihugu akamaro (RURA), rwatangaje uburyo bushya bw’ingendo buzakoreshwa n’abagenzi bajya mu ntara, mu rwego rwo gukemura ibibazo byo kubura imodoka n’umuvuduko mwinshi muri gare ya Nyabugogo.
Ni itangazo RURA yashyize hanze ku wa kabiri, rimenyesha Abanyarwanda bose ko guhera ku wa 23-24 Ukuboza 2024 no ku wa 30-31 Ukuboza 2024, abagenzi bajya mu turere dutandukanye tw’igihugu bakoreshaga gare ya Nyabugogo bazakoresha ahandi hagenwe.
RURA yavuze ko abagenzi bajya mu Majyepfo, mu turere twa Kamonyi, Muhanga, Ruhango, Nyanza, Huye, Nyamasheke, Karongi, Ngororero, Gisagara, Rusizi, Rutsiro na Nyaruguru, bazategera imodoka i Nyamirambo kuri Stade Pele.
Aberekeza mu Burasirazuba mu turere twa Rwamagana, Kayonza, Gatsibo, Nyagatare, Ngoma na Kirehe, bazafatira imodoka muri Gare ya Kabuga.
Mu gihe abajya mu Majyaruguru muri Gicumbi, Nyagatare, Rulindo, Musanze, Rubavu, Burera, Gakenke na Nyabihu, bazategera Nyabugogo, naho abajya i Bugesera bazaguma muri gare ya Nyanza, Kicukiro.
RURA irasaba abateganya ingendo mu bihe by’iminsi mikuru kuzitegura kare, bagura amatike kare mu rwego rwo kwirinda umuvundo, ndetse banasaba abantu kwihanganira zimwe mu mbogamizi bashobora kuzahura nazo.
