Ikigo cy’igihugu gishizwe kugenzura ubuziranenge bw’ibiribwa n’imiti mu Rwanda FDA, yahagaritse umuti uri mu bwoko bw’ifu witwa ‘Flucazol® Powder for Oral Suspension’, ufite nimero AD220070A.
Ni itangazo Rwanda FDA yashyize hanze ku wa gatatu, tariki ya 27 Ugushyingo 2024, imenyesha abafite ububiko, abinjiza uyu muti, amavuriro, abaganga ndetse n’abakoresha uyu muti ko uhagaritswe bitewe nuko utujuje ubuziranenge.
Rwanda FDA yatangaje ko uyu muti ukorwa n’uruganda rwa Gracure Pharmaceuticals Limited, rwo mu Buhinde, ukuwe kw’isoko ry’u Rwanda, nyuma y’ubusesenguzi bwakozwe n’iki kigo ndetse n’inyandiko y’ikigo EXPHAR s.a. cyo mu Bubiligi, gifite uruhushya rwo gushyira ku isoko uwo muti.
Uyu muti uhagaritswe hashingiye ku kuba ingano yawo idahuye n’ibipimo ngenderwaho, bituma mu kuwufungura ukoresheje amazi, ifu yawo idashonga neza, bigatuma ingano y’umuti uvura utagera ku kigero gikwiye.
FDA Rwanda irasaba amafarumasi aranguza, anacuruza umuti ‘Flucazol® Powder for Oral Suspension’ kuwusubiza aho bawuranguye, ndetse n’umuntu wese waruri kuwufata kuwuhagarika, akawusubiza kuri Farumasi.
