RwandAir yatangije ingendo zo mu kirere z’ubwikorezi bw’imizigo, mu mujyi wa Harare muri Zimbabwe.
Ni itangazo ryanyujijwe ku rubuga rwa X rw’iyi Sosiyeti y’Ubwikorezi bwo mu Kirere (RwandAir), rivuga ko yatangije ingendo z’ubwikorezi bw’imizigo mu cyerekezo cya munani kijya mu murwa mukuru wa Harare.
Izi ngendo zizafasha mu guteza imbere ubucuruzi nka sosiyeti imwe ikora ubwikorezi bw’imizigo mu kirere, mu karere u Rwanda ruherereyemo.
Mu itangazo bagize bati ” Ni n’uburyo bwo guteza imbere ubucuruzi no gukomeza gufata umwanya w’imbere mu bijyanye no gufasha abo mu Karere mu itwarwa ry’imizigo yabo.”
Mu Gushyingo 2023, nibwo RwandAir yaguze indege ya mbere itwara imizigo ya Boeing B737-8SF, ifite ubushobozi bwo kwikorera nibura toni 23.904, ikaba ishobora gukora urugendo rw’ibilometero 2620.
Iyi ndebe yari isanzwe ikorera ingendo mu mujyi wa Sharjah muri Leta Zunze Ubumwe z’Abarabu (UAE), muri Djibouti, Entebbe muri Uganda, Nairobi muri Kenya, Brazzaville muri Repubulika ya Congo na Bangui muri Santarafurika.
