Umuhanzi Safi Madiba ukubutse muri Amerika, yahakanye ibyo gusubira muri Urban Boys, yongera kugaruka ku rwibutso afite kuri Nizzo na Humble Jizzo.
Ubwo yari mu kiganiro the Kiss Breakfast kuri Kiss FM, Safi Madiba yavuze ko bidashoboka ko bakongera kwihuza nka Urban Boys bakaba batatu.
Umunyamakuru Anita Pendo yamubajije urwibutso abafiteho, Safi Madiba avuga ko abibuka cyane nk’abantu batangiranye urugendo rw’umuziki, batangiriye kuri zero bakazamukana.
Ati” Dukora Show ya mbere yari i Nyanza, yari ibihumbi 30 baduha 15, bwari ubwa mbere twishyuwe, byari ibintu biryoshye cyane kumva ngo ugiye kuririmba baguhaye amafaranga, ariko nyine icyakoze nuko baduhaye 15 gusa andi barayatwambura. Rero kumva umuntu mwatangiye murya ku bihumbi 15 mukagera ku rwego miliyoni izamo, ebyiri.. ibyo ni ibihe wibuka ba bantu, ugahora ubyibuka.”
Safi Madiba yavuze ku buzima yabanyemo na Nizzo na Humble Jizzo ubwo bari bakiri itsinda rya Urban Boys.
Ati” (Nizzo) niwe muntu kenshi iyo twavaga muri Concert twakundaga kuba turi kumwe nyuma yayo. Humble yakundaga kureba Filime ya Jumanji.”
Umuhanzi Safi Madiba yabaye mw’itsinda rya Urban Boys imyaka irenga icumi, bakoranye indirimbo nyinshi zakunzwe zirimo ‘Umwanzuro’, ‘Tayali’ bakoranye n’umunya-Nigeria, Iyanya, ‘Nipe’ bakoranye n’umunya Uganda Ykee Benda n’zindi nyinshi zanditse amateka.
