Umutoza ukomoka muri Amerika, Sam Vincent, watozaga MBB (Made By Ball) yo muri Afurika y’Epfo mu mikino ya Nile Conference, yagizwe umutoza wungirije wa APR Basketball Club mu mikino ya nyuma ya Basketball Africa League (BAL) igiye kubera muri Afurika y’Epfo kuva tariki ya 6 kugeza ku wa 14 Kamena 2025.
Sam Vincent wigeze kwegukana Igikombe cya NBA hamwe na Boston Celtics mu 1986, yari umutoza wa MBB yo muri Afurika y’Epfo mu marushanwa ya Nile Conference yabereye i Kigali kuva tariki ya 17-25 Gicurasi 2025, ndetse iyi kipe yatozaga yitwaye neza mu mukino yatsinzemo APR BBC amanota 94-88.
APR BBC na Al Ahli SC yo muri Libya ni yo makipe abiri yabonye itike zo gukina imikino ya nyuma ya Playoffs izabera i Pretoria muri Afurika y’Epfo, nyuma yo kuva muri Nile Conference ihiga MBB ya Afurika y’Epfo yarangirije ku mwanya wa gatatu n’intsinzi ebyiri mu mikino ine na Nairobi City Thunder yarangirije ku mwanya wa kane, ibura amahirwe yo gukomeza.
Nyuma yo gusezererwa kwa MBB, Umutoza Sam Vincent yahise ajya ku isoko ry’abatoza, ari nabwo yahise yitabazwa na APR BBC ngo afashe Umutoza Mukuru wa APR BBC, James Maye Jr. muri iyi mikino ya nyuma.
Maye na Vincent basanzwe bafitanye umubano ukomeye ndetse bagize uruhare rukomeye mu guteza imbere urubyiruko binyuze mu mikino ya Basketball ku Mugabane wa Afurika.
Sam Vincent afite amateka akomeye muri Afurika kuko yatangiye gutoza Ikipe y’Igihugu ya Afurika y’Epfo mu 1999, ndetse yaje no kuyigeza ku mwanya wa cyenda mu marushanwa Nyafurika ya 2003, ari na wo mwiza yigeze igira.
APR BBC kuri ubu iri gutozwa na Maye na Vincent ifite umukino wayo wa mbere kuri uyu wa Gatandatu, tariki ya 7 Kamena 2025, aho izaba ihura n’Ikipe ya Petro de Luanda, yo muri Angola, uyu mukino uzaba saa 16:00 ku isaha y’i Kigali. Ni umukino ugamije gushaka kureba uko amakipe akurikirana ku rutonde mbere yo gutangira imikino ya ¼.
