Abayobozi muri serivisi z’ubuzima muri Seychelles bayobowe na Minisitiri w’Ubuzima waho bari mu Rwanda, aho bari kwiga uko rwishatsemo ibisubizo rukoresha abajyanama b’ubuzima mu kuvura no gutanga serivisi ku baturage benshi mu buryo bworoshye.
Aba bayobozi basuye ibikorwa by’ubuzima mu Karere ka Bugesera ku wa Gatatu tariki ya 25 Nzeri 2024. Bimwe mubyo basuye harimo ibitaro bya Nyamata n’ibigo Nderabuzima bitandukanye, bagaragarizwa uko abajyanama b’ubuzima bafasha abaturage umunsi ku munsi.
Minisitiri w’Ubuzima wa Seychelles, Peggy Vidot, yavuze ko impamvu baje kwigira ku Rwanda Ibijyanye no kwegereza ubuvuzi abaturage ari uko rugeze ahashimishije cyane mu kwifashisha bamwe mu baturage baba bahuguwe mu kuvura bagenzi babo.
Ati “Birashimishije ko ubu buvuzi butangwa n’abaturage ubwabo, aribo bajyanama b’ubuzima ibi bituma abaturage bagira icyizere kuri serivisi bahabwa bikabarinda kuzahazwa n’uburwayi. Ubu buryo bw’imikorere y’abajyanama b’ubuzima natwe iwacu tuzagerageza kubukoresha turebe.”
Kuri ubu abajyanama b’ubuzima ni rumwe mu rwego rwafashije u Rwanda mu kugabanya malaria no gutanga ubuvuzi burimo ubw’impossible, gufasha imiryango kuringaniza imbyaro, gukurikirana abagore batwite, gutanga ibinini by’inzoka ku bana bato ndetse no kugira inama abaturage muri buri mudugudu kubijyanye n’ubuvuzi.
Kuri ubu mu Rwanda hose habarurwa abajyanama b’ubuzima barenga ibihumbi 58, aho buri Mudugudu habarurwamo abagera kuri bane.
