Umuhanzi The Ben yagiranye ikiganiro n’abanyamakuru kuri uyu wa mbere, aboneraho gusaba imbabazi Mama we nyuma yo gukoresha umugore we Pamella agaragaza inda mu mashusho y’indirimbo ‘True Love’, ndetse asezeranya abakunzi be ko abahishiye igitaramo kidasanzwe ku itariki ya 1 Mutarama 2025.
Iki kiganiro n’abanyamakuru cyabaye kuri uyu wa mbere, tariki ya 30 Ukuboza 2024, ahanini cyagarukaga ku myiteguro y’igitaramo yise ‘The New Year Groove’, kizaba tariki ya 1 Mutarama 2024, muri BK Arena ubwo azaba amurikiramo album nshya yise ‘Plenty Love’.
Mugisha Benjamin uzwi cyane ku mazina ya The Ben, yavuze ko gukoresha Pamella mu ndirimbo ye agaragaza inda atwite, byari uburyo bwo kubika urwibutso, ariko nyuma yo kubona ko bitishimiwe na benshi, harimo na Mama we, yifuje gusaba imbabazi.
Yagize ati: “Na Mama wanjye ntabwo byamunezeje. Mama umbabarire.”
Iyi ndirimbo ya “True Love” ikubiye mu kigize album ye nshya, aho The Ben yavuze ko ifite igisobanuro gikomeye mu rukundo rwe na Pamella, akaba ari ikimenyetso cy’uburyo urukundo rwabo rwashibutse.
The Ben yaboneyeho kurarikira abantu kuzitabira igitaramo cya ‘The New Groove’, asobanura ko kidasanzwe gitandukanye n’ibyo abakunzi b’umuziki basanzwe babona mu Rwanda.
Yagize ati” Ni igitaramo kidasanzwe, harimo imyiyerekano itunguranye (Suprise performance), ziteguye mu buryo butandukanye.”
The Ben yagaragaje ko igitaramo cye kizaba kidasanzwe, hari byinshi bitari bisanzwe yageneye abakunzi be kuri uriya munsi, ndetse ararikira abakunzi be kuzitabira ku bwinshi iki gitaramo bakaza kureba ibyo abahishiye.
Igitaramo cya The Ben cyizitabirwa n’aba bamwe mu bahanzi bakoranye mu bihe bitandukanye, amatike yo kwinjirayo ni 5000 ahasanzwe ibihumbi 10 mu myanya yo hejuru, ibihumbi 15 hasi, ibihumbi 20 hasi imbere, ibihumbi 25 CIP, n’ibihumbi 50 muri Corporate corner, ndetse n’itike ya miliyoni 1.5 Frw muri Bussiness suits.
