Guverinoma y’u Rwanda n’iyu Bushinwa byasinye amasezerano y’inguzanyo y’arenga miliyari 66 Frw, azifashishwa mu kubaka Urugomero rwa Giseke, ruherereye mu Karere ka Gisagara no kwagura umushinga wo kuhira imyaka mu buryo bugezweho.
Aya masezerano yashyizweho umukono kuri uyu wa Gatatu, tariki ya 22 Mutarama 2025, yari ahagarariwe na Minisitiri w’Imari n’Igenamigambi, Yusuf Murangwa na Ambasaderi w’u Bushinwa mu Rwanda, Wang Xuekun.
Inkunga y’u Bushinwa izatangwa na Banki y’Ishoramari, EXIM Bank izishyurwa ku nyungu ya 2% mu gihe cy’imyaka 20 uhereye ku mwaka wa 6,5.
Urugomero rwa Giseke ruzatanga amazi yo kuhira ku bantu bagera kuri 4500, bo mu Karere ka Gisagara, mu rwego rwo kubasha kwihaza mu biribwa no kubona umusaruro uhagije, badakomwe mu nkokora n’imihindagurikire y’ibihe.
Uru rugomero ruzafata amazi yo mu bice birukikije birimo imigezi no ku misozi, aho ruzaba rufite ubushobozi bwo kuhira imyaka igizwe n’ibihingwa bitandukanye iri ku buso bwa hegitari zirenga 2640.
Ambasaderi Wang Xuekun avuga ko mu myaka itatu igihugu cye kizakomeza gukurikirana umusaruro wavuye muri uyu mushinga urimo kuba abaturage bazabasha kwihaza mu biribwa.
