Ikigo cy’Igihugu gishinzwe Ubuzima, RBC, cyibukije abantu kwihutira kwipimisha indwara y’ibibembe mu gihe babonye ibimenyetso byayo, ndetse agaragaza ko abantu benshi bayibagiwe ku buryo butuma n’abayanduye bajya kuyivuza yatangiye kubagiraho ingaruka.
Umukozi ushinzwe kurwanya indwara zifata igice cy’ubuhumekero muri RBC, Nshimiyimana Kizito, avuga ko ibara riza ku ruhu ritaryaryata, ari ikimenyetso cy’indwara y’ibibembe, ndetse avuga ko abantu benshi bajya kwa muganga aruko batangiye kubona ingaruka yayo.
Ati “Abantu bagomba kuyivuza hakiri kare bakavurwa bataragira ingaruka, kuko ibyo abantu benshi babona nk’indwara babona ingaruka bakazita ibimenyetso.”
Nshimiyimana Kizito avuga ko mu ntangiriro y’indwara y’ibibembe, uyifite aba yumva nta kibazo afite, ariko igira ingaruka mu mubiri nko kuma kw’amaso bishobora kuvamo ubuhumyi, gukunjama amaboko n’ibindi.
Yakomeje avuga ko ibibembe ari indwara isa n’iyibagiranye mu bantu ndetse n’ingamba zo kuyirinda no kuyikurikirana abantu batazishyiramo imbaraga nk’uko bikorwa ku zindi ndwara, gusa agaragaza mu gihe ubonye ibimenyetso ahise yivuza, ari indwara ikira.
Ibibembe biri mu ndwara zititaweho Leta y’u Rwanda n’Isi ifite muri gahunda yo kuyirandura burundu mu 2030. Ni indwara iterwa n’agakoko kitwa Bacille de Hansen, igaragara ku ruhu ariko ifata imyanya y’ubuhumekero.
Raporo ya 2024 y’Ishami rya Loni ryita ku Buzima, OMS, yagaragaje ko u Rwanda ruri mu bihugu biri kurandura iyi ndwara, kuko ubu abayisigaranye babarirwa muri 37 mu gihugu hose.
