U Rwanda na Poland byasinye amasezerano mpuzamahanga yerekeye ubufatanye bwo mu kirere azwi nka ‘Basic Air Service Agreement’, azafasha mu guteza imbere ubukungu n’ubukerarugendo hagati y’ibihugu byombi.
Aya masezerano yashyizweho umukono na Ambasaderi w’u Rwanda muri Poland, Prof Anastase Shyaka na Ministeri ushinzwe Ubwikorezi bwo mu kirere wa Poland, Maciej Lasek.
Amb. Prof. Shyaka yasobanuye ibyerekeye aya masezerano, ati” Ubu Sosiyete y’u Rwanda itwara abantu n’imizigo mu nzira y’ikirere, RwandAir na Lot ya Sosiyete y’Igihugu ya Poland babonye uburyo bakubakiraho ubufatanye bwakorohereza abagenzi b’ibihugu byombi, ndetse n’abandi banya-Burayi baturanye na Poland.”
Ibihugu byombi byashimye intambwe ikomeje guterwa mu kuzamura ubufatanye mu bijyanye n’ubukungu, ishoramari n’ubukerarugendo.
