Intumwa z’u Rwanda, Repubulika Iharanira Demokarasi ya Congo na Angola byashyizeho urwego rw’abasirikare rushinzwe gukurikirana ishyirwa mu bikorwa ry’agahenge mu ntara ya Kivu y’Amajyaruguru, katangiye ku wa 5 Kanama 2024.
Uyu mwanzuro wafatiwe ku mupaka w’u Rwanda na RDC uzwi nka La Corniche, ku wa 5 Ugushyingo 2024, muri gahunda yari yahuje intumwa ziri mu biganiro byo kugarura amahoro muri ibi bihugu byombi, aho abagize uru rwego bashyizweho ari abasirikare 18 ba Angola, batatu b’u Rwanda na batatu ba RDC.
Uru rwego rwashyizweho na Perezida wa Angola João Lourenço usanzwe ari umuhuza muri ibi biganiro, rukaba rushinzwe kugenzura ishyirwa mu bikorwa ry’gahenge gashingiye ku mwanzuro wafashwe n’intumwa z’u Rwanda, RDC na Angola mu rwego rw’aba Minisitiri mu biganiro byabereye i Luanda tariki ya 30 Nyakanga 2024.
Minisitiri w’Ububanyi n’Amahanga wa Angola, Tete Antonio yagize ati “Icyemezo cyo kongerera ubushobozi uru rwego rwari rusanzwe rukora cyafashwe na Perezida João Lourenço, umuhuza wagenwe na AU. Hashingiwe ku byo twashakaga kugeraho, byanzuwe ko rwongererwa ubushobozi.”
Minisitiri w’Ububanyi n’Amahanga w’u Rwanda, Ambasaderi Olivier Duhungirehe yatangaje ko bakurikije ibyavugiwe mu biganiro ku mpande zombi hari icyizere cyo kugarura umutekano mu Burasirazuba bwa DRC.
Intumwa ku mpande zombi zizongera guhura tariki ya 16 Ugushyingo zisuzuma raporo y’inzobere mu iperereza ziherutse kwemeza ya gahunda ihuriweho yo gusenya umutwe w’iterabwoba wa FDLR, izagenda no gukuraho ingamba z’ubwirinzi z’u Rwanda.
