Ku mugoroba wo ku wa Kane, tariki ya 12 Ukuboza 2024, ku kibuga cy’Indege Mpuzamahanga cya Kigali, hakiriwe icyiciro cya 20, cy’abimukira n’impunzi 149, baturutse muri Libya.
Ubutumwa bwatanzwe na Minisiteri Ishinzwe Ubutabazi, bugaragaza ko u Rwanda rwakiriye impunzi ziturutse muri Libya zigizwe n’abakomoka muri Eritrea 54, Sudani 51, Somalia 12, Ethiopia 15 na 17 bo muri Sudani y’Epfo.
Impunzi zakiriwe zahise zijyanywa mu Nkambi y’agateganyo ya Gashora, mu Bugesera, ari naho bakomeza gucumbika mu gihe hagishakishwa uburyo burambye zafashwamo.
Kwakira impunzi biri mu masezerano u Rwanda, Ishami rya Loni ryita ku Mpunzi, HCR, n’Umuryango wa Afurika Yunze Ubumwe byasinyanye, azwi nka ‘Emergency Transit Mechanism, ETM’.
Iyi gahunda yashyizweho hagamijwe gufasha Abanyafurika bari mu kaga, ndetse n’abahura n’ibibazo bitandukanye, mu gihe bajya i Burayi ndetse bamwe bakahasiga n’ubuzima.
