U Rwanda rwashyikirije u Buhinde, Salman Khan ukurikiranyweho ibyaha by’iterabwoba n’ibindi bifitanye isano.
Ni igikorwa cyabaye mu gitondo cyo kuri uyu wa gatatu, tariki ya 27 Ugushyingo 2024, ku Kibuga mpuzamahanga cya Kigali, aho inzego z’umutekano z’u Rwanda zashyikirije uyu Muhinde, inzego z’umutekano z’u Buhinde.
Salman Khan yafatiwe mu Rwanda, nyuma y’ubusabe bwa Leta y’u Buhinde, bwanyujijwe kuri Interpol, bugaragaza ko yari akurikiranyweho ibyaha by’iterabwoba ndetse ashakishwa.
Ubu busabe bwakiriwe na Leta y’u Rwanda, bugaragaza ko Salman Khan yaje mu Rwanda atorotse u Buhinde, mu gihe abandi bari bafatanyije icyaha bo bafashwe.
U rwego rwa Interpol mu Rwanda rwafashe uyu muhinde, rubimenyesha igihugu akomokamo, maze gitanga ubusabe bw’uko bamuhabwa agakurikiranirwa muri icyo gihugu.
Minisiteri y’Ubutabera y’u Rwanda, yemeye ubu busabe, maze itanga uruhushya ko yasubizwa mu gihugu cye agakurikiranwa.
Umushinjacyaha ku rwego rw’Igihugu, Siboyintore John Bosco, yavuze ko u Rwanda ari igihugu kigendera ku mategeko kandi kitihanganira abanyabyaha.
