Minisitiri w’Uburezi Joseph Nsengimana yatangaje ko leta y’u Rwanda yihaye gahunda yo kongera umubare w’abanyamahanga biga muri Kaminuza z’u Rwanda, izaba yagezweho mu 2035.
Ni bimwe mu byagarutsweho ubwo Minisitiri Nsengimana yagiranaga ibiganiro n’Abadepite bagize Komisiyo y’uburezi, ikoranabuhanga, umuco, siporo n’urubyiruko mu Nteko Ishinga Amategeko y’u Rwanda, kuri uyu wa Kane, tariki ya 28 Ugushyingo 2024.
Muri ibi biganiro bibanze ku byavuye mu isesengura ry’ishyirwa mu bikorwa rya Politiki y’Uburezi yo mu 2003, na gahunda y’uburezi yo kuva mu 2017-2024, n’ishyirwa mu bikorwa ry’imishinga itandukanye.
Minisitiri Nsengimana yavuze ko hakozwe byinshi bishingiye kuri politiki y’uburezi ya 2003, ari nayo ikigenderwaho mu guteza imbere uburezi.
Yagaragaje ko mu bijyanye n’uburezi bwo mu ma mashuri makuru, u Rwanda rwifuza kuba ahantu h’icyitegererezo muri Afurika ku bijyanye na Kaminuza, ku buryo abanyamahanga bazajya batekereza kwiga mu Rwanda.
Ati “Turifuza ko u Rwanda rwagirwa ahantu h’icyitegererezo muri Afurika ku bijyanye na Kaminuza ku buryo Abanyafurika batekereje kwiga muri Kaminuza bazajya baza mu Rwanda, kandi iyo nyigo iri gukorwa.”
Yashimangiye ko iyo ntego izaba yagezweho mu 2035, aho u Rwanda ruzazamura umubare w’abanyamahanga biga muri Kaminuza z’imbere mu gihugu, ariko kandi bikajyana no kuzamura umubare w’Abanyarwanda bazigamo.
Mu Rwanda hari kaminuza 35 muri zo eshatu ni iza Leta. Abanyeshuri biga muri aya mashuri bagera ku bihumbi 120, barimo ibihumbi 10 b’abanyamahanga.
Raporo ya 2024 yakozwe n’ikigo ‘Times Higher Education’, yashyize Kaminuza y’u Rwanda na University of Global Health Equity (UGHE), muri Kaminuza 10 za mbere muri Afurika yo munsi y’ubutayu bwa Sahara.
MINEDUC yemeje ko kuba uwo mubare warabashije kugerwaho uvuye ku 1397 mu 2017/2018, kandi utari washyizwe mu ntego, bisobanuye ko mu gihe igihugu cyakwiha intego yo kongera uwo mubare nta kabuza wagerwaho.
