Umuyobozi Mukuru wa Rwanda Polytechnic, Dr Slyvie Mucyo, yatangaje ko abanyeshuri bayo bakoze imodoka y’amasiganwa ya ‘Cross Car’, bishimira amahirwe bahawe ndetse bigaragaza ubushobozi bafite, bwo kuba bakora n’izindi modoka.
Ni ibyo Dr Slyvie Mucyo yagarutseho kuri uyu wa mbere, tariki ya 16 Ukuboza 2024, ubwo yaganiraga na IGIHE, agaragaza ko abanyeshuri ba Rwanda Polytechnic bishimira kuba imodoka ya mbere y’amasiganwa yakorewe mu Rwanda aribo bayikoze.
Ati “Yari amahirwe akomeye kuri Rwanda Polytechnic muri rusange, mu ntego yayo yo kuzamura ubumenyi ndetse no mu kuzamura ibikorwa bya tekinike bitanga ibisubizo bitandukanye.”
Uyu muyobozi yahamije ko ikorwa ry’iyi modoka ryagizwemo uruhare n’abanyeshuri na n’abarimu b’iki kigo, ndetse ko ibikoresho byakoreshejwe byiganjemo ibyo mu Rwanda na bike byatumijwe hanze nka moteri yayo.
Yongeyeho ko igikorwa nk’iki cyerekana ubushobozi bw’ibyo abanyeshuri bashobora gukora, n’ubumenyi bashobora kongererwa, ku buryo mu gihe kiri imbere bashobora gukora n’izindi ‘Cross Car’ zakwifashishwa mu masiganwa mu Rwanda.
Uyu muyobozi yagaragaje ko abanyeshuri b’ishuri ayobora bashobora kubyaza umusaruro ibyo biga mw’ishuri bakabishyira mu bikorwa, ndetse ashima ubumenyi bwabo mu guhanga, kuko babashize guhangana n’imbogamizi bahuye nazo.
Iyi modoka yo mu bwoko bwa Cross Car yakozwe mu gihe cy’ukwezi, yamuritswe na Perezida Paul Kagame n’umuyobozi wa FIA, Mohammed Ben Sulayem, ku munsi wabanjirije itangwa ry’ibihembo ku bakinnyi bahize abandi muri Formula One 2024.
