Ikiyaga cya Ruhondo giherereye mu Majyaruguru y’u Rwanda, kiri ku birenge by’ibirunga bine aribyo Sabyinyo, Muhabura, Gahinga na Bisoke, gikunze gusurwa na ba mukerarugendo bifuza kuruhukira kure y’umujyi n’urusaku, no kumva amahumbezi, dore ko hariyo ibirwa byubatseho hoteri nziza zo kuruhukiraho wihera ijisho amazi wumva akayaga gatuje.
Ikiyaga cya Ruhondo giherereye mu bilometero 17 uvuye mu mujyi wa Kigali, n’ibindi umunani ukora uvuye mu mujyi rwagati wa Musanze. Gihana imbibi n’uturere dutatu two mu Majyaruguru aritwo Burera, Musanze na Gakenye.
Iki kiyaga gifite ubuso bwa hegitare 2800, cyakira amazi avuye mu mugezi wa Mukungwa na Nyabugogo, kikaba giteganye n’ikindi cya Burera bitandukanywa na kilometero imwe y’ubutaka, byavutse nyuma yiruka ry’ikirunga cya Muhabura, bikaba ari ibiyaga bigaragara munsi ya Sabyinyo na Muhabura, ndetse bituriye umupaka w’u Rwanda na Uganda.
Ukigera kuri Ruhondo usanganirwa n’abana bakwakirana urugwiro mu mbona yabo, cyane cyane ko abahasura kenshi atari abasanzwe bahatuye, maze abo bana bakakuganiriza ari nako bakubaza iby’aho uvuye. Ibi bikaba mu bituma urushaho kuryoherwa no kuba uhageze.
Ku nkombe z’iki kiyaga uhasanga ubwato bufite umusare bugufasha gutembera mu mazi, ndetse ni nabwo bukwambutsa ugana kuri bya birwa biriho hoteri nziza zo kuruhukiraho witegeye amazi areremba, ibirunga ndetse n’ibimera.
Ruhondo iri mu biyaga bikurura ba mucyerarugendo baba abanyamahanga n’Abanyarwanda, aba bose bahakunda bitewe ni imiterere myiza yacyo, ndetse n’ishusho yacyo uri hejuru ku kirwa, yiyongera ku mwuka mwiza uzanwa n’amazi.
Sibi gusa kuko iki kiyaga cyatanze imirimo ku bahaturiye barimo abatwara ubwato bazwi nk’abasare, n’imirimo yo kuroba ku bandi bakabona amafi yo kurya ndetse bagasagurira amasoko, ndetse n’abakora muri hoteri ziri ku kirwa kiri mu kiyaga, n’indi myinshi.
