Umuraperi Nsikayesizwe David Junior Ngcobo uzwi ku mazina ya Nasty C yagaragaye ku rutonde rw’abahanzi bazaririmba mu Iserukiramuco rya ‘Access’, ariko kandi akaba ari no mu bahanzi bazitabira igitaramo cya Davis D cy’izihiza imyaka icumi amaze mu muziki.
Iri serukiramuco rizaba tariki 14-16 Ugushyingo 2024, muri Mundi Center aho biteganyijwe ko Nasty C azataramira abazaryitabira, ndetse akanatanga ikiganiro kigaruka ku rugendo rwe rwa muzika.
Ku rundi ruhande uyu muhanzi ukomoka mu gihugu cya Afurika y’Epfo yatumiwe mu gitaramo cyo kwizihiza imyaka icumi umuhanzi Nyarwanda Davis D amaze akora umuziki, asimbuye Victony ukomoka muri Nigeria utazaboneka.
Igitaramo cya Davis D kizaba tariki ya 29 Ugushyingo muri Kigali Conference and Exhibition Village ahazwi nka Camp Kigali, cyatumiwemo abahanzi barimo Platini P, Nel Ngabo,Bull Dogg, Bushali,Davy Scott, Maurice, Ruti Joel, Dj Marnaud, Dj Toxxyk, Melissa, Danny Nanone na Nasty C uzaza aturutse muri Afurika y’Epfo.
Ibi bitaramo bibiri byazamuye urujijo hibazwa niba Nasty C azataramira mu Rwanda nyuma y’iminsi 15 akongera akagaruka kwa Davis D, ariko uyu muhanzi Nyarwanda yahakaniye InyaRwanda ko atari ko bimeze.
Ati” Ntabwo ari byo! Kuko natwe tukimara kubibona twavuganye na Nasty C n’abashinzwe kumufasha mu muziki batubwira ko atari byo. Bivuze ko ntabwo azaza muri ‘Access’ ahubwo azaza aje mu gitaramo cyanjye ‘Shine Boy Fest’ gusa.”
Nasty C wamenyekanye mu ndirimbo zirimo ‘Particular’ yakoranye na Major Lazer na DJ Maphorisa, ‘The Coolest Kid in Africa’ yakoranye na Davido n’izindi.
Akaba atari ubwa mbere azaba ataramiye i Kigali kuko no mu 2023 yahataramiye mu gitaramo cyiswe ‘Ferwaba All Star Concert’ no muri 2022 atarama muri ‘Chop Life Kigali’.
