Umufaransa Joris Delbove ukinira Team TotalEnergies yegukanye Agace ka Kane ka Tour du Rwanda ka Rubavu-Karongi kakinwe ku ntera y’ibilometero 95,1, ahita afata umwambaro w’umuhondo uhabwa uyoboye abandi ku rutonde rusange.
Agace ka Kane kakinwe ku wa Kane, tariki ya 27 Gashyantare 2025.
Abakinnyi 68 ni bo basiganwe muri aka gace kegukanwe na Joris Delbove TotalEnergies wakoresheje 2h27’20”.
Yakurikiwe na Brady Gilmore (Israel Premier Tech) yasize 3″, anganya na
Henok Mulubrhan (Eritrea) na Lorrenzo Manzin (TotalEnergies).
Umunyarwanda wasoreje hafi ni Manizabayo Eric (Java-InovoTec) wabaye uwa karindwi, akurikiwe na Masengesho Vainqueur (Rwanda) barushijwe amasegonda atatu.
Umufaransa Joris Delbove yahagurutse i Rubavu arushwa isegonda rimwe na mugenzi we wo muri TotalEnergies, Fabien Doubey, yamusize amasegonda atatu [kuko yasoreje ku mwanya wa gatanu] bituma yambara umwambaro w’umuhondo.
Nyuma y’uduce tune tumaze gukinwa, Joris Delbove (TotalEnergies) ni we uyoboye aho amaze gukoresha 12h24’57”.
Akurikiwe na Fabien Doubey (TotalEnergies) asiga 2″ mu gihe Masengesho Vainqueur ari we Munyarwanda uri hafi aho ari ku mwanya wa cyenda aho asigwa amasegonda 29″.
Tour du Rwanda 2025 izakomeza ku wa Gatanu hakinwa umunsi wayo wa gatandatu mu Gace ka Gatanu kazahagurukira mu Mujyi wa Kamembe ho mu Karere ka Rusizi kerekeza i Huye ku ntera y’ibilometero 144.
